గూగుల్‌ సర్వీస్‌లోని జీమెయిల్‌, గూగుల్‌ ఫొటోస్‌లోని ఇమేజెస్‌, వీడియోస్‌, గూగుల్‌ డ్రైవ్‌లోని సమాచారం స్టోర్‌ చేసుకోవడానికి ఒక లిమిట్‌(15 జీబీ) అంటూ ఉంది కదా. ఒకవేళ ఆ పరిధి దాటి ఉపయోగించుకోవాల్సి వస్తే.. స్టోరేజ్‌ను మంత్లీ/ఇయర్లీ ప్యాకేజీల వారీగా కొనుగోలు చేసుకోవాల్సి ఉంటుంది. తాజాగా గూగుల్‌ వన్‌ యాప్‌ ప్రకటన ప్రకారం.. తక్కువ ధరలో 5 టీబీ స్టోరేజ్‌ కోసం నెలకు 1,649రూ. అందిస్తుండగా, ఏడాది ప్లాన్‌కు 15, 900రూ. చెల్లించాల్సి ఉంటుంది.
మిగతావి ఇలా..
ఇక 5టీబీ స్టోరేజ్‌ను కుటుంబ సభ్యులతో, స్నేహితులతో కలిసి పంచుకునే వీలు కూడా ఉంది. అంతేకాదు భారత్‌లో కొన్ని ప్రాంతాల్లో గూగుల్‌ వీపీఎన్‌ సర్వీస్‌ సైతం ఉపయోగించుకునే వెసులుబాటును కల్పించనుంది గూగుల్‌. గత ప్లాన్‌ల ప్రకారంగానే స్టోరేజ్‌ ప్యాకేజీలను గూగుల్‌ యూజర్లకు అందిస్తోంది. 100 జీబీ స్టోరేజ్‌ కోసం నెలకు రూ.130 చెల్లిస్తే.. , ఏడాదికి 1,300రూ. చెల్లించాలి. 200జీబీ ప్లాన్‌ కోసం నెలకు 210రూ., ఏడాదికి 2,100రూ. చెల్లించాలి. 2 టీబీ స్టోరేజ్‌ కోసం నెలకు 650రూ., ఏడాదికి రూ.6,500 చెల్లించాల్సి ఉంటుంది. ఈ మూడు ప్లాన్స్‌ కూడా గూగుల్‌ వన్‌ వెబ్‌సైట్‌, యాప్‌ ద్వారా సబ్‌స్క్రయిబ్‌ చేసుకోవచ్చు.
రేటు ఎక్కువే..
అయితే 2 టీబీ స్టోరేజ్‌ కంటే మించి ప్లాన్స్‌ మాత్రం యాప్‌ ద్వారానే సబ్‌స్స్ర్కయిబ్‌ చేసుకోవాల్సి ఉంటుంది. యాప్‌లో 10 టీబీ ప్లాన్‌ నెలకు రూ.3,249రూ. కాగా, 20 టీబీ స్టోరేజ్‌కు నెలకు 6,500రూ. చెల్లించాల్సి ఉంటుంది. ఇక టాప్‌ టైర్‌ ప్లాన్‌గా చెప్పుకునే 30టీబీ స్టోరేజ్‌ కోసం నెలకు 9,700రూ. చెల్లించాల్సి ఉంటుంది. ఇక 100 జీబీ, 200జీబీ, 2టీబీ ప్లాన్స్‌ గూగుల్‌ వన్‌ వెబ్‌సైట్‌ కంటే యాప్‌లో అత్యధిక రేటుకు అందజేయడం కొసమెరుపు.
